Արման Երիցյան
1975 թվականի հունիսի 22-ին ծնված Արման Երիցյանը հայ վավերագրող կինոռեժիսոր է, որի ֆիլմերը ցուցադրվել են աշխարհի բազմաթիվ փառատոներում։ 2001 թվականին ավարտել է Խ․ Աբովյանի անվան հայկական պետական մանկավարժական համալսարանի ռեժիսուրայի բաժինը՝ Դմիտրի Կեսայանցի արվեստանոցը։ Եղել է Ռուսաստանի Հանրային հեռուստաընկերության «Դարի հերոսները» փաստավավերագրական շարքի ռեժիսոր, նկարահանել է սոցիալական հոլովակներ, ինչպես նաև աշխատել է «Ֆիշկա-ֆիլմ» ստուդիայում, Monarch Films-ում, Ինտերնյուզ Հայաստանում և այլ հայկական հեռուստաալիքներում։
Առաջին ֆիլմը՝ «The End»-ը, թողարկվել է 2004 թվականին, որին հետևել են «Բաց երկնքի տակ» (2005), «Ողջույն, Ֆելլինի» (2007), «Հայաստանի վերջին լարախաղացը» (համառեժիսոր՝ Իննա Սահակյան, 2010), «Մեկ, երկու, երեք» (2015) և միջազգային տարբեր մրցանակների արժանացած այլ կինոնկարներ։ Երիցյանը եղել է երևանյան «Ոսկե ծիրան», ռուսաստանյան «Ուղերձ մարդուն», «Սարատովյան տվայտանքներ» և մի շարք այլ կինոփառատոների ժյուրիի անդամ։
